Ɲɛtaa ni yiriwa : dugujɛ te tɛmɛ dugu la k’a ka dɔgɔ Ɲɛtaa ni yiriwat ɛ fɛn kɛrɛbkɛrɛnnen ye ka bɛn yɔrɔ dɔw ma. Sigida bɛɛ danma ka kan a la. O la, walasa a ka waleya, fo sigida kɔnɔ ka bɛn, ka hakili jagabɔ kɛ sigida kɔnɔfɛnw kuraw n’a kɔrɔlen kan, ka fɛɛrɛ jɔnjɔn tigɛ u tɔnɔ bɔli kanma. Mali ye jamanaba ye min sigidaw tɛ lahalaya kelen na : fo ka se bi ma, a dɔw tun ma siraba sɔrɔ, kuranko ni telefoni ko donnen kura dɔw bara. Ninnu bɛɛ ye dun fɛn ye a sɔrɔbagaw bolo.
Yiriwa ni ɲɛtaa minɛn don an ka kan ka minnu fara an bolo kan. Siraba bɛ taama nɔgɔya, kuran bɛ masinmafɛn ladonni nɔgɔya an ka baara kɔnɔ, telefɔni bɛ cilase teliya.

O tuma, a tɔ ye anw yɛrɛw de k’a lajɛ an bɛ u don da min na, ani mun kanma. Sɛnɛ, baganmara, mɔɔni ni nakɔbaara de kodɔnnen don kosɛbɛ an ka sigidaw kana. Olu ye an ka ladalabaaraw ye.

O baara ninnu kɛcogo kɔrɔw nafa dɔgɔya fɔra. Bi, n’an ye cakɛminɛn kuraw ni diɲɛ lahalaya kuraw fara an bolo la, sɔrɔdabɛn sira kura wɛrɛw bɛ se ka dayɛlɛn sigida kɔnɔ. Sirabako nafama yɔrɔ dɔ ye mɔbilibaw boliyɔrɔ-ko nɔgɔya. Nka, olu lakolon fana ka kan ka boli dɛrɛ.

O tuma a ka kan nakɔbaaraw, situlu dilannaw, jiriforobaaralaw, safunɛdilanw da fara ɲɔgɔn kan walasa u ka baara kɛlenw ka mɔbilibaw wulikun bɔ. O tɛ ɲɛ jɛkabaara kɔ. Nakɔbaara o, jiriden baara o, nin baara kelen o kelen nana sabati jɛkulu fɛ, o nafa tɛ se ka fɔ ka ban. Nakɔbaaralaw bɛ nafa sɔrɔ ka se sigida ma, bawo olu ka baara bɛ kɛ baara suguya wɛrɛw sababu ye i n’a fɔ jagosiraw, lasogon baaraw… Ninnu bɛɛ bɛ kɛ sababu ye ka sigida dɔnɔ mɔgɔw basigi, bawo taama kun ye musaka ɲini de ye.

Bɔkɔ nata kɔnɔ, an da bɛna se jiriforo baara ni nakɔbaara ma, k’an hakilina di o yiriwa cogo n’o labɛnko ɲuman kan.

Bakari Sangare