Ne Denba Kane bɛ sɛbɛn in labɛn an ka dugu lahala kan, n’o ye Yarangabugu ye. Yarangabugu ye Kolokani kafo dugu kɔrɔba dɔ ye. A sigibaga bɛrɛbɛrɛw ye kanew ye. A tɛngunnen bɛ dugu min na, o ye Mabugu ye. Yarangabugu ni Kolokani dugu cɛ ye kilomɛtɛrɛ 25 ɲ ɔgɔn ye. A dugu sigilen bɛ siraba kan min bɛ bɔ Kolokani ka taa Tumanibugu, kakɔlɔw rɔ. N’I bɛ bɔ Kolokani ka taa Yarangabugu, i bɛ Jijeni sira minɛ ni kilomɛtɛrɛ 2 ɲ ɔgɔn ye, Kolokani kɔfɛ. Siraba bɛ fara I nunmanfɛ. I b’o minɛ. I bɛ Kulukɔrɔnin ni Seriwala ani Korola duguw latɛmɛ, ka sɔrɔ ka don Yarangabugu. Korola dugu ni Yarangabugu dugu bɔlen don ɲ ɔgɔn na ni kɔfoolon dɔ de ye.
Yarangabugu ye dugu ye sɛnɛ bɛ kɛ yɔrɔ min kosɛbɛ : ɲ ɔ ; tiga ; keninge. Awa, baganmara siratɛgɛ yɛrɛ la, Yarangabugu dugu ye fulawɛrɛw sigiɲ ɔgɔn dugu ye, ka bi lawale la. O de kanma, misi nɔnɔ ani bagan misɛn nɔnɔ bɛ sɔrɔ an bara san waati jan kɔnɔ.

Hali ni Gansiraba Kane ma kɛ dugutigi ye Yarangabugu a ka balo si kuntaala kɔnɔ, a kɔni kɛra maa ye min tɔgɔ donna tariku la Yarangabugu, hali ka se Kolokani mara bɛɛ ma. Gansiraba Kane, Yarangabugu suruku yɛlɛma, ale ye janjon kɛ ka se a ɲ ɛma baganwɛrɛ caman kɔnɔ dɛrɛ !
Fɛn min ye cikɛ taabolo ye, Yarangabugu kɛra duguba ye o dakun na, kabi tiga ni suman sɛnɛ baarada ka waati la, n’o ye OACV ye.

Nin yɔrɔ in na, n bɛ taasibila kɛ ka se an ka sɛnɛkɛlakɔliden kɔrɔ ma, Seku Tarawele, ale min faatura Yarangabugu, a ka baara dakun na, ani k’a janaja kɛ yen.
Balikukalan siratɛgɛ la, o karamɔgɔba caman fɔfɔra ɲ ɔgɔn kɔ an bara yan, k’a ta san 1977 la, ka se san 1982 ma. Olu dɔw ye Ɲ ama Sangare ye ani Tumani Yalam Sidibe ani Mahamani Mayiga ye.

Lakɔliso ni musojiginso b’an bara yan ka bi san jan. O yɛrɛ kɛra nisɔndiyakoba ye an bolo san 1978.
O san de la, an ka lakɔlikaramɔgɔ dɔ, ko Bukari Jalo, ani an ka muso tinminɛ matɔrɔni dɔ, ko Asitan Samake, olu ye ɲ ɔgɔn ta furu la.

Yarangabugu ye bamanandugu ye. Awa, bamanan ladako bɛɛ fana bɛ kɛ an bara yan.
An bɛ don min na i ko bi, an b’a ɲ ini jamana ɲ ɛmaaw fɛ u k’u janto Kolokani kafo mara duguw bɛɛ la dɛmɛ siratɛgɛ la, ka da an ka dugukolo cogoya yɛrɛ kan. Dugukolo nafa man bon anw bara yan, i n’a fɔ a bɛ cogo min na Mali woroduguyanfanw fɛ (Sikaso ; Kucala…)
N b’a bɛɛ fo.

Denba Kane
Ka bɔ Yarangabugu (Kolokani)