Farikolo kɛnɛya : faatɔya
Diɲɛ in kɔnɔ, adamadenw si ka ca cogo min u farikololabanaw fana si ka ca ten. An b’a dɔw dɔn ni bana ye ; an b’a dɔw dɔn ni latigɛ ye, an b’a dɔw yɛrɛ dɔn ni ɲɛɲini ye. Nka, dɔgɔtɔrɔ dakun na, fɛn o fɛn bɛ adamaden farikolo, a hakili walima a jogo fiɲɛtigiya, o bɛɛ bɛ ɲɛfɔ. Nin de siratɛgɛ la, an sera dɔgɔtɔrɔ Jabi ma Maɲanbugu kin kɔnɔ Bamakɔ, a ka dɔ fɔ an ye banaw siratɛgɛ la, kɛrɛnkɛnnenya la faatɔya.

An ka jamana kɔnɔ yan, faatɔya bana taasira ye saba de ye : faa sumalen, min b’a tigi bila waati ni waati kelennakuma na ani kelenna-yɛlɛ-misɛn ani maakelenya. Nka ale tɛ se maa ma, awa, a bɛ adamadenya yɛrɛ kɛ. Filanan ye faabilen ye. O tigilamaaw de bɛ an ka sigidaw bɔlɔnfɛ, u lankolon an’u bɔlen adamadenya taabolo kadara ɲuman bɛɛ kɔnɔ. Ni maa ma se olu ma, u tɛ se maa ma. Nka u b’u laɲinibagaw jaabi jaabicogo jugu la ! A sabanan ye bɛrɛntɛfaa ye. O ye faa ye wuliwaati ni wulidon bɛ min na. A caman ta ye juma ye, nk’a bɛ se ka kɛ kunɲɔgɔn don kelen-kelen bɛɛ ye. Ale faatɔ suguyaw bɛ wele an bara yan ko jinɛ ni mɔgɔ !

Furakɛli
I n’a fɔ bana tɔw bɛɛ, faatɔya fura fɔlɔ ye ladonko ɲuman de ye. O bɔlen kɔ yen, an k’a dɔn ko fɛn min ye bana in furako gɛlɛya ye, o ye k’a bɛ hakili taasira de la. O kanma, fɛn o fɛn bɛ na ni mɔnɛ jugu ye walima dimi jugu, walima dɛnkɛrɛfɛ-walew ye, an kana o si ɲɛsin an ka faatɔw ma. An bɛɛ b’a dɔn ko adamadenya yɛrɛ sinsinnen don hakili de kan. N’o dɛsɛrɛ yɔrɔ o yɔrɔ, denmisɛnya, fo baganya b’i magɛrɛ ! O de b’a to faatɔ bɛ ko-kɛbaliw kɛ i n’a fɔ fɛn-nɔgɔlen-dunw , yɛrɛ-labila ; tile-banyaala. O kanma, an ka ladonni siratɛgɛ la, barika ka don labasigili la yɔrɔ kelen ani ka dumuniw d’a ma minnu tun ka d’a ye sanni a ka bana cɛ.

Faatɔya bɛ a banabaatɔ bɔ maa tɔw ma. I b’a sɔrɔ fɛn min bɛ maa kɛnɛmanw dimi, o tɛ ko k’ale la. Awa, ko min ye tulonko ye maa kɛnɛmanw bolo, o b’ale bila dimi bilen kɔnɔ. O kanma, an k’a ɲini k’u tanaw dɔn ani k’u ka bana juguya waati dɔ. Nin bɛ kɔfɛ, an k’an magɛrɛ dɔgɔtɔrɔ faamuyalenw la bana yɛrɛ furako lakika kanma.

An ka nin bɔ an hakili la
A man kan an ka faabana juba kɛ jinɛko danma ye ka banako bila kɛrɛfɛ. Diɲɛ dɔnnikɛlaba dɔ ka kuma tɛ wa : tiɲɛ ni nkalon bɛ yefɛnw de la. Nka gundo so kɔnɔ, foyi tɛ yen ‘n y’a bila yɔrɔ min na » kɔ !
An k’an balima faatɔw ladon ani k’u furakɛ, o b’a to hali n’u ma don maaya dakun bɛrɛbɛrɛ kɔnɔ, u kɔni ka k’an dɔ ye. O fana ye fɛnba ye adamadenya kɔnɔ !

Tumani Yalam Sidibe