Fɔlɔ fɔlɔ, jele tun tɛ adamadenw bolo. U tun bɛ fara girinw de kɛ k’u ka tigɛfɛnw tigɛ. O baaraw tun bɛ se ka maasiba caman lase u ma waati dɔw la : u bolow tun bɛ tigɛ fara dadiya senfɛ. Tuma dɔw yɛrɛ, faraw tun bɛ yuuru u senw kan k’olu kari. Adamaden ka diɲɛnatigɛ tun bɛ kɛ gɛlɛya kɔnɔ dɛrɛ. Nin waati ye a sɔrɔ adamaden tun ye tasuma lakodɔn dɛ. A tun tɛ a ka fɛnw kɛnɛ dun belen, i n’ a fɔ a tun b’a kɛ cogo min kɔrɔlen.

Don dɔ la, muso kɔnɔma dɔ de bɔra a ka dugu kɔnɔ k’a bɛ taa dɔgɔɲini na. A sera kungo kɔnɔ waati min, a ye a sɔrɔ k’a tun ɲinɛna a ka jiritigɛfara kɔ so. Walasa a kana segin so ten a bololankolon, muso kɔnɔma in ye dɔgɔ jalannin dɔw saasa, k’olu da ɲɔgɔn na k’o kɛ dɔgɔsiriba kelen ye. Baara tɔ tora a ɲunni de ye sa a ka doni in na ka sɔrɔ ka so magɛn. Ka dɔ bɔ dɔgɔsiri la, o ma kɛ muso fɛko ye. Ale kelen dun tɛ se ka a yɛrɛ ɲun.
A tora munumunu de la sa a ka dɔgɔsiri dafɛ, ka tile waati jan kɛ. Wulatilejan selen, muso ye mankan dɔ mɛn ka bɔ kunjɛtu dɔ kɔnɔ. O kumakan tun bɛ k’a fɔ ko : « i k’a dɔn ko ni adamaden senninfila-boloninfila n’a ka fitiriwaleya tun tɛ, ne tun bɛ ko kɛ muso in ye ani k’a ɲun ! »
Muso girinna ka taa i ɲɔngiri tun kɔrɔ ka kumakan in jaabi ko : « e min bɛ se k’o bɛɛ kɛ ne ye, ni ne kɛra fitiriwale ye i ma yali e, tɛ se ka ne segin n cogo kɔrɔ la wa ? »

O yɔrɔ bɛɛ, cɛ-janba dɔ bɔra tu kɔrɔ, jirinɛgɛ (jele tɔgɔ fɔlɔ) tun b’a kan na. A nana o da muso kan na, ka sɔrɔ k’a ɲun ! Muso taara. A nisɔndiyalen. O de kɛra jele sɔrɔcogo ye diɲɛmaaw fɛ. Nka, a ma taa ka kumakan ka jɔɔrɛnako dan. Barisa jele nalen a kali kan fɔlɔ kɛra k’ale tɛ jiri to kungo kɔnɔ. Ale dun bɔra o de la. O tɛ muru kelen ye k’an tan fara.

Bukayi Jara
Ka bɔ Tonba-Jijɛni
Kolokanai mara la