Dugubakɔnɔsigi ni dugumisɛnkɔnɔsigi gɛlɛyaw
Danfara belebele bɛ duguba ni dugumisɛn cɛ. Duguba jama ka ca, sira ɲumanw, so ɲumanw, yeelen bɛ fan bɛɛ fɛ, u ka fɛnw kɛrɛnkɛrɛnen don. I bɛ kobaw y’a kɔnɔ, kobaw bɛ k’a kɔnɔ, u ka kɛnɛya sabatilen don, hali wari sɔrɔ ka di duguba kɔnɔ ka tɛmɛ dugumisɛn kan.
Duguba mɔgɔ tɛ fangalabaara kɛ ka fɛn sɔrɔ abada. Nka ni dugumisɛn mɔgɔ ma fangalabaara kɛ, a tɛ fɛn sɔrɔ. Ladamu ni hinɛ ɲɔgɔnna min bɛ duguba mɔgɔw la, o tɛ dugumisɛn mɔgɔw la. Hasidiya ka ca dugumisɛn kɔnɔ. Duguba hɛrɛ ka ca, a hinɛ ka bon ni dugumisɛn ye, dumuni nafama, u yeko ka ɲi, u haminanko man ca.

Dugumisɛn mɔgɔ haminanko ka ca u ka sɔrɔw ma. Duguba ɲɛnajɛlen don sanga ni waati bɛɛ. Nka duguba kɔnɔ sigi ka gɛlɛn n’i tɛ fɛn kɛ. Dugumisɛn kɔnɔ mɔgɔ kɔrɔdɔn ka di ka tɛmɛ duguba kɔnɔ mɔgɔ kan, duguba kɔnɔ mɔgɔ kɔlilen tɛ dɔn joona. Nka ni dugumisɛnw kɔnɔ mɔgɔ sɛgɛnna, a kɔrɔdɔn ka di a yeko la, a ka sɔrɔ kɛ cogo la. O hukumu kɔnɔ, bamananw ko u ka kuma dɔ la ko : « ɲɛ tɛ kɔgɔma na dɔn, nka tulu bɛ min na a tɛ fili o ma dɛ !»
Nɛnɛɲini Tangara
Animatirisi ka bɔ Joro Medini

-------

Mun bɛ mɔgɔ kisi malo ma ?
I ka kɛ mɔgɔ hakilima ye ka i yɛrɛ dɔn. I ka kɛ mɔgɔ sɛbɛ ye, ka kɛ mɔgɔ ladamunen ye, ka kɛ sɛbɛkɛla ye baarada la.
I k’i yɛrɛ bonya. N’i sera k’i yɛrɛ bonya, i na mɔgɔ wɛrɛ bonya. N’o kɛra, i k’i donyɔrɔ dɔn. I man kan ka don yɔrɔ minnu na fana, i k’olu dɔn, i da ka kan ka don kuma minnu na, k’olu dɔn, a man kan ka don minnu na, k’olu fana dɔn. I k’i kuma cogo dɔn. N’i bɛ kuma, i ka jateminɛ kɛ k’a don n’i ka kuma fɔta bɛ bɛn. I kana kuma fɔ ten, n’i bɛ fɛn o fɛn fɔ, i jija a ka kɛ kuma sɛbɛ ye. I ka kɛ mɔgɔ cɛsirilen ye baara la.
Aminata Wɔlɔgɛmu

-------

Ɲininkalikɛla tɛ fili
Ne bɛ ɲininkali kɛ Jamana baarada la, aw ka n jaabi Jɛkabaara nimɔrɔ dɔ kɔnɔ, mɔgɔ wɛrɛ ka se k’a faamu ka fara ne ɲininkalikɛla kan. N b’a fɛ k’a dɔn, aw bɛ an ka sigi kibaru minnu lase an ma Jɛkabaara kunnafonisɛbɛn kɔnɔ, yali jamana ɲɛmaaw, n’o ye Mali ɲɛmaaw ye, u bɛ sɛbɛn in sɔrɔ k’a kalan wa, foroba baarada ɲɛmaabaw (dirɛkitɛriw) fana dun ?
Siyaka L. Tarawele