Ɲɛtaa ni yiriwa bɛ baara kɛcogo ɲuman ni nafa jiidilen kofɔ. O mana kɛ baara suguya o suguya ye, magan kɛbabaga wajibiyalen don ka hakilijagabɔ kɛ baara kɛta lasabatili fɛɛrɛ n’a waleyaminɛnw kan, walasa nafako kuma ka fɔ. Baara timinandiya ni wɔɔsijiba suuru ni hakilijagabɔ sabatilen ye sɔrɔ yiriwali sendaɲɛ fɔlɔ ye. Ɲɔba sɔrɔ, jiriden caman tigiya, nin bɛɛ ye daamu ye. An k’an yɛrɛ magan forow ni nakɔw ni bagankow na, ani an bololamagayɔrɔw la, ka sɔrɔ kɛ. O ye wasa koba ye. An ka baara bɛɛ laban ye sanni-feere bolodali ye. O la, o ko bɛ garisɛgɛ ni sannikɛlaw bolo. Nin mɔgɔ min ko bi, ko sanni-feere, o tigi b’a fɔ ko sɔngɔ. Tiɲɛ don, sannifeere sabatiko ɲuman dulonnen don fɛn caman na, i n’a fɔ, fɛn feereta sawura, feere yɔrɔw, feerebaga, feere waati. Nin lahalayaw bɛɛ rɔ, sɔngɔ de jɔyɔrɔ ka bon kosɛbɛ, bawo sannikɛlaw ɲɛ b’o de fɔlɔ ye, feerefɛn sawura tɛmɛnnen kɔ. O kama, sɔngɔ man kan ka sigi cogoya la, min bɛ sannikɛla labali. A man kan ka kɛ sababu ye ka diyagoya la, min bɛ sannikɛla labɔli. A man ka kɛ sababu ye ka jagokɛla fana labin. Kabini lawale la, an b’an ka sɔngɔw sigi. Sɔngɔko tɛ kokura ye an fɛ yan. N ka waati n’a cogoya kosɔn, an ka laadalasira caman kɛmandi ka fɛn sɔrɔ bi. O de kama yɛlɛman ka kan ka don a dɔw la. Kunun, barika tun bɛ dugu kolo la, jiri tun ladon ka di, jilafɛnw tun bɛ sɔrɔ nɔgɔya la. O tɛmɛnen kɔ, fɛn kɛbagaw tun ma ca yɔrɔ kelen na. Misali la, safunɛ, situlu, furabɔ tun bɛ kɛ denbaya walima kabila dɔw taamaserelan ye sigida kɔnɔ. N’o kobilaw n’o denbayaw tun tɛ mɔgɔ tun tɛ nin fɛn nɔgɔya la sigida kɔnɔ. O tuma, o waati la, san diyara o san ma diya o, sunsun tun bɛ den o tigiw bolo. Bi, gɛlɛya barika bonyalen don yɛrɛ ɲini ye baaraw kɛbagaw caya, k’a kɛyɔrɔw caya, ka ɲɛnawoloma don sugu la. Bi, an ka baara bannen kɔ, n’an bɛ an ka feerefɛn sɔngɔ sigi, an k’an hakilito nin yɔrɔ damadɔw la, walasa an ka se k’an wɔɔsi tɔnɔbɔ teliya la. Walasa an ka sɔngɔw sigi, an k’an jija ka jate minɛ kɛ nin fɛn damadɔw kan. Baara musaka an yɛrɛw ka magan, an ka tɔnɔ. Ni sɛnɛ don, baara musaka ye lakɛfɛnw ye. Cikɛla bɛ magan min kɛ, a ka kan k’o sara bisigi tile la ; k’o fara sɛnɛ lakɛfɛnw musaka kan k’a ka tɔnɔ da o kan k’o tila a ka fɛn sɔrɔlen hakɛ la walasa ka fɛn kelen sɔngɔ sigi. Ni nin jate taabolo fana faraala sugu kibaruyaw kan, a kac’a la an ka sɔngɔw tɛ kɛ fɛn damatɛmɛnw ye sannikɛlaw bolo. An ka sugu bɛ diya, an bɛ nafa sɔrɔ an ka baara la. Hakili la jigin siratɛgɛ la, ɲɛtaani yiriwa ye jɛkulu ko de ye. Ɲinɛn kana kɛ o kɔ.

Bakari Sangare