Walasa maa k’a dɔn waati bɛ ka fɛn min bila a ɲɛ waati kɔnɔ, f’a k’a dɔn a b’a kɔ bi waati bɛrɛbɛn cogo min, k’a tɔnɔbɔ waati nataw kan !
Ifaransi Konɛ
arajo Bɛnkan laɲagalikɛla dɔ Bamako

Ni kɔrɔ bɛ maaya la, wulucɛkɔrɔ n’a ka kɔlɛ t’o dɔn dɛrɛ. Ale min n’a ka kɔlɛ bɛ maaninfin kɔlɔsi, k’a ladon ani k’a sako bɛɛ k’a ye, o ka sɔrɔ k’u wulu-gɛn n’a ka maasɛbɛn kunbɔra !
Fode Jɛnseni Kamara
ka bɔ Ɲumala (Sibi)

Kolaminɛbali kan tɛ wa ! A ko kun tɛ adamadenya la. Ni adamadenya gɛlɛyaliko nin y’ale sɔrɔ dɔrɔn, a dabali bɛ b’an yɛrɛma, k’a jigilatigɛ, k’a bila kunfɛko maaya kadara kɔnɔ. Maalankolonya dɛrɛ !
Basidi Koyita
jamalaɲagali Bamako sugu kuru

Cɛ ye naani ye, muso ye kelen ye : muso ye muso ye ; cɛ min tɛ se k’a yɛrɛɲɛnabɔ muso kɔ, o ye muso ye ; denmisɛn min ma se musoko ma, o ye muso ye ; cɛkɔrɔba min tɛmɛna musoko ma, o fana ye muso ye.
Alimami Ba
tarikubɔla Segu

Maa tɛ kɛ diinɛtigi ɲɛnama ye ka sɔrɔ i tɛ maloya. Hali kafiriya tɛ ɲɛ maa la ka sɔrɔ i tɛ maloya. Maloya de ye adamadenya sindi ye. Malo tɛ maa min na, o ye bagan ye, hali ni adamadenya misali b’a la.
Alimami Ba
tarikubɔla Segu

N’a y’a sɔrɔ adamadenya gasi tun ye kogo jɔlen de ye, maa si tun tɛ sɔn i sen ka d’a kan. Nka kogo tɛ, hakiliko don. O de kosɔn maa hakilimaw b’a ye k’u yɛrɛ tanga a ma.
Alimami Ba
tarikubɔla Segu