An bɛ diɲɛ waati min na i ko sisan, hali ni tile ma bɔ tilebin fɛ fɔlɔ k’a binyɔrɔ kɛ kɔrɔn ye, diɲɛ kow taabolo kɔlɔsibagaw bɛɛ kɔni y’a faamu ko yɛlɛma donna diɲɛsosigi taabolo la, fo yɛlɛmaba. Nin yɔrɔ in na, n da bɛna se fɛn kelenpe min ma yɛlɛma taabolo caman cɛ rɔ, o ye mara dɛsɛli ye an ka gaw kɔnɔ. Bi, ga bɛɛ kɔnɔ, gaden bɛɛ kɛlen bɛ hakɛ ɲinibagaw ye. Cɛw ko k’olu de ye ko kuntigi ye, ko olu sako de bɛ kɛ ; musow ko ko cɛ ni musoya tɛ, barisa cɛ bɛ min kɛ muso fana b’o kɛ ; denmisɛnw ko k’olu fana ye adamadenw ye, awa dankari tɛna kɛ maa si ka adamadenya la ! Kow gɛlɛyara fo ka se dabaliban ma. Hali furuw yɛrɛ taabolo kɛ, barika bɔra o la sa dɛrɛ. Aw m’a ye furusa ani furulagosi cayalen bɛ cogo min bi. Ni fɛn min dun wuliyɔrɔ ma ɲɛ, o seyɔrɔ tɛ kɛ wasako ye dɛrɛ. Ga dun kɔnɔko bɛɛ ju sigilen don jɔsen min kan, o ye furu kɛcogo yɛrɛ ye. O de kanma, fɔlɔ, an ka maakɔrɔw tun tɛ tulon kɛ furu donni na ɲɛsin ma. O siratɛgɛ de la, ɲɛbilawale caman tun bɛ furu la : bɔyɔrɔ sidɔnni ; bangebagaw danbe ; gatigi ka dumarafanga ; maminɛni ; muso yɛrɛ ka adamandenya lahala walima furukɛ sɔrɔta ka adamadenya ; furu dilanni taamabagaw lahala, sodenya ; kɔɲɔbɔli.
Nin kelen kelen bɛɛ n’a jɔyɔrɔ tun don furu taabolo ɲuman na. Bɔko nataw kɔnɔ, an da bɛna se u ma kelen kelen k’u tɛmɛsiraw n’u nafaw pereperelatigɛ.

An ka maakɔrɔw ka faamu na, cɛ b’a ka cɛya dakun na furu min kɔnɔ, muso fana b’a ka musoya kadara kɔnɔ, den lankolon tɛ bange o du kɔnɔ dɛrɛ ! Aw m’a ye, denw ɲɛ mana yɛlɛn fa bɔrɔntɔli kan ba fɛ, olu tɛna bangebaga bonyali kɛ fɛn wɛrɛ ye waatiko kɔ dɛrɛ.

N hakili bɛ manakaw ka Buguse Jan Dunbiya ka nin kɔrɔfɔ la san 1982 waatiw la.
Buguse Jan ko n ye ko : “karamɔgɔ, bangebagaw bonyadon sɔrɔ ka gɛɛn furuɲɔgɔnw ka ɲɔgɔnlagosidu kɔnɔ dɛ. Den bɛ wolo du min kɔnɔ, a b’o de sawura ta. O de kanma, fɔlɔ, an tun bɛ barika bɛɛ don furuɲɔgɔn ɲuman sɔrɔli la an denmuso walima an denkɛ ye. O de ye ko kolomayɔrɔ ye du yɛrɛ ka ɲɛnamaya la !” Fɔlɔ, furusa walima furulagosi tun tɛ ye ka caya barisa furu bɛɛ tun bɛ sinsin fa ni ba danbe kan, awa, furu bɛɛ tun bɛ ɲini karisa de ye a k’a di denkɛ ma, walima a ka k’a denmuso cɛ ye. O kanma, furumuso bɛɛ tun jigiyamaa bɛ kofɔ a ye cɛ balimasiraw la, a bɛ min k’a kunkofɔbaga ye. Furuw ɲinicogo an’u doncogo yɛrɛ kanma, an ka maakɔrɔw tun ka faamuya ye kofuru bɛ, nka, furusa tɛ. O de kanma, hali u tun tɛ sɔn ka furusa kunmafɔjama lasigi dugu jiri man di kɔrɔ. Barisa, u ka faamu na, furu bɛ sa jiri min kɔrɔ, o jiri tɛ jiriya kɛ belen ! K’an bɛn bɔko nata.

Tumani Yalam Sidibe