Maa tɛ kɛ maa fɛ gansan ; maa t’i ban maa la gansan, nka maa bɛ k’i yɛrɛ ye gansan. Ni maa dun kɛra i yɛrɛ ye, i bɛ sɔrɔ diɲɛ fanɲumanbolo de kan waati bɛɛ. O ka ɲi dɛrɛ !

Tumani Yalam Sidibe

Poyi : wale
I ka kɛta kɛ
I k’a lakali to a tigilamaaw bolo.
Tigilamaa
Bɛɛ bɛ kundoni ɲɛɲinini na dɛrɛ.
E m’a ye,
Hali n’i kelen sira k’i jɔ i sen kan,
I ka bon da gasonnen kɔnɔ,
Dugusɛ mana jɛ
Maa sure dɔ na sɔrɔ
K’i majamu i ka si-ka-jɔ la.
Kɔlɔsibaga bɛ bɛɛ la
Kɔlɔsibaga bɛ ko bɛɛ la.
O kanma,
N’i b’i pan
Kana i pan k’i bɛ bɛɛ dan ;
K’i pancogo ka bɛɛ ɲɛfa ;
Ko bɛɛ ka wasa n’i ka panni ye.
O si tɛ bɛnnsenmako ni ko wɛrɛ ye,
Barisa
Maa kelen si tɛ kɛ kɔgɔ ye
Ka na bɛɛ labɔ.
Nka,
N’i b’i pan,
I pan i pancogo lakika la.
N’o kɛra
I mafɔbagaw b’i mafɔ,
Ka sɔrɔ e m’o laɲini.
N teri, kɛnɛ jɛnin bɛɛ tɛ bokɛyɔrɔ ye
Awa tufin bɛɛ fana tɛ silatunuyɔrɔ ye.
Aa ! jaa dɛrɛ !

Tumani Yalam Sidibe