Bi, sɛnɛkɛlaw bɛɛ ka laɲini ye tubanɔgɔ dilan izini ɔli ye Mali kɔnɔ, o de bɛ se ka kɛ sababu ye ka sɛnɛnafafɛnw jigin dɔɔnin, minisiri Seyidu Tarawele ka fɔ la, iziniko in ye u hakilina ye min b’a to Burɛmunɔgɔ bɛ se ka don ba la.
A yɛrɛ ka fɔ la, a sɛbɛnko bɛ banbana a jɛɲɔgɔn minisiri Usumani jamu bolo min baara ɲɛsinnen bɛ cakɛda hakɛlamaw ni dɔgɔmaniw musakako ma, o tɛmɛnen kɔ, fanga ka kumalasela don. “Kumaɲɔgɔnya tɛmɛna a ni kɔkan musakabɔlaw cɛ, n’o y’u dɛmɛbagaw ye walasa ka nafolow fara ɲɔgɔn kan ka kɛ manankun ye. Ofisi-di-Nizɛri ɲɛmaaba ye sɛnɛkɛlaw nisɔndiya kuma fɔ. A ka fɔ la, sɛnɛkɛmansi 175 bɛ na Ofisi-di-Nizɛri mara kɔnɔ.
Yusufu Fane

Bilancɛla 2
Girin kɛlen bɛ kɔkanmalo kan
Jabali Mamadu Kamara ka fɔ la, malo wɛrɛ dunni ye maloyako ye olu bolo, kuma tɛ kɔkanmalo ma. “Kɛrɛnkɛrɛnnenya la, ne yɛrɛ kunmasuulilen don nin ko la ” A ye nin kuma fɔ arabadon, utikalo tile 24, san 2005 minisiri ka taama senfɛ Jabali. Ofisi-di-Nizɛri sɛnɛkɛlaw bɛ kɔgɔn la. A bɛ sanji fila (2) bɔ u bɛ malo kilogaramu 1 san sɛfawari dɔrɔmɛ bi wɔɔrɔ (60). O ye fɛn ye maa tun ma sigi ni min ye. O bɛɛ n’a ta, hali malo ladonni “patanti” binni gofɛrɛnama fɛ jagokɛla dɔw ye, sɛnɛkɛla caman bɛ yen minnu tɛ suman sɔgɔn yɛlɛnni kalama.
Ofisi-di-Nizɛri ɲɛmaaba ka fɔ la, salon malosɔrɔbaliya de kɛlen bɛ sababu ye ka balo sɔgɔn yɛlɛn. O hukumu kɔnɔ, a y’a ɲini sɛnɛkɛlaw fɛ, u k’u cɛsiri kosɛbɛ dɔ ka fara ɲinan san sɔrɔ hakɛ kan walasa dunkafa bɛ sabati.

Yusufu Fane