An bɛ don min na i ko bi, kunfɛkokɛ nafa dɔgɔyara. O la, an bɛ baara o baara daminɛ, a k’a sɔrɔ an ye hakilijagabɔ sabatilen kɛ, kɛta n’a kɛkun kan, ani a kɛyɔrɔ. O lahalaya ninnu jɔyɔrɔ ka bon kosɛbɛ an wɔɔsi tɔnɔ bɔli la. Yiriwa ni ɲɛtaa jɔsen kolo gɛlɛn ye kunnafoni ye cogo min na, sugu sidɔnni fana b’o cogo la. Sugu ye mun ye ɲɛtaa ni yiriwa kadara kɔnɔ ? sannisen ni sannibolo, n’o tɛ kɛnɛ

kɛrɛnkɛrɛnnen minnu b’an ka sigida n’a masurunyaw la, n’an bɛ sanni-feere k’u kan, olu ko tɛ. An bɛ safunɛdilanna kɛ misali ye walasa k’an ka sannisen ni sannibolo hakilinan walanwalan ; Ni mɔgɔ min ye safunɛdilan kanu, o tigi ka kan ka hakilijagabɔ kɛ fɔlɔ a sigiyɔrɔ lahalaya kan safunɛko ta fan na. Tile o tile safunɛ labaarata ye joli ye sigida kɔnɔ. A bɛ don dawɛrɛ jumɛnw fɛ finiko ni minɛnnɔgɔko ko bɔlen kɔ a la. Lada jumɛn bɛ sigida kɔnɔ safunɛko kan. O jateminɛw kɛli b’a to safunɛdilanna b’a ka dilanta hakɛ dansigi ; O b’a to fana a b’a ka baarakeminɛn ɲinintaw hakɛw ni fanga sigi. Baara lasabatita bɛ daminɛ ni nin jatew de ye. A nɔ ye ka telin, bawo ni sigida kɔnɔ safunɛ ko wajibiyalen jate dɔnna, baara min bɛ kɛ o ka nafa fila tileman b’o la. A fɔlɔ, safunɛ tɛ gala, filanan, safunɛ bɛ kɛ a ɲinibagaw bolokɔrɔ tuma bɛɛ. O ye sugu sidɔnni taabolo fɔlɔ ye. Ale dafalan bɛ kɛ feerefen sɔngɔ sigili jateminɛ ye. An b’o dakun walawala bɔko wɛrɛ kɔnɔ.

Sugu sidɔnni taabolo filanan baaraw bɛ ɲɛsigɔ sigida kɛrɛfɛlaw lahalaya ma. Bɔko kɔrɔlenw kɔnɔ an jira k’a fɔ ko ɲɛtaa ni yiriwa baara dabɔkun tɛ yɛrɛbakun nafa walima yɔrɔ damadonin nafa ɲinini ye. O hukumu kɔnɔ, ɲɛmada ka kan kɛ sigida n’a lamini bɛɛ de kan k’a dɔn n’a y’a sɔrɔ u fana mako bɛ se fɛn dilanta ma. O bɛ se ka kɛ safunɛ ye, situlu, nakɔfɛnw, jiriden, walima bololafɛn dilantaw i n’a fɔ misidaba, daba, sabara, filenw ani galama ɲɛgɛnnenw. Ninnu bɛɛ ye maaya makoɲɛfɛnw de ye nafa bɛ sɔrɔ minnu baarako ɲuman na. Nka, fo hakilijagabɔ de ka kɛ sugu kan. Ka jago siraw ni jajo yɔrɔw woloma ka sɔrɔ k’a baaraw daminɛ. N’o kɛra, an ka baara kɛtaw bɛ kɛ jama nafafɛnw ye. K’a da u labɛncogo kan mɔgɔ wɛrɛw bɛ se ka bololaminɛyɔrɔ sɔrɔ an kɛrɛfɛ. O de bɛ na ni yiriwa ni ɲɛtaa ye sigida mumɛ kɔnɔ.

Bakari Sangare