« Mali gɔfɛrɛnama y’a ɲini depitebulon fɛ, ka sariyasen 10 nan wuli ka bɔ « BNDA » kan, min tun b’a to BNDA tɛ lɛnpow sara, i n’a fɔ banki tɔw ».

Depitew ka ladalasigi tɛmɛnen labandon, sanni u ka k’an bɛn di ɲɔgɔn ma kalo fila sɛgɛnnafiɲɛbɔ kanma, depitew ye hakilinandi kɛ taratadon, zuluykalo tile 2, san 2005. O tun bɛ tali kɛ yɛlɛma de donni na cikɛlaw ka banki, n’o ye BNDA ye, taabolo de la. BNDA lahala yɛrɛ kanma, lɛnpo sarata caman tun bɔlen b’a kan Mali jamana ka sariya fɛ. Nka, bi yɛlɛma caman donna BNDA kuntilenna na, min y’a kɛ banki lakika ye. Awa, banki tɔw bɛ nafasɔrɔbaara fɛn o fɛn kɛ, BNDA fana b’o kɛ. Fɛn min ye juru donni ye min bɛ sara n’a kanda tɔnɔ ye, BNDA b’o kɛ i n’a fɔ banki tɔw. O kanma a fana tɛna kɛ yɔrɔ wɛrɛ ye ka bɔ BNDA kan, n’o tara san 1981 feburuyekalo tile 11 sariyasen 10 nan fɛ, o kɔnɔkow tun b’a fɔ de ko : « ka d’a kan BNDA bɛ baara kɛ cikɛdaw ; Mali jamana ani a yɛrɛ de tɔgɔ la, lɛnpow ni saalen tɔw wulira ka bɔ a kan ». N’i dun y’a lajɛ bi, BNDA kelenpe tɛ banki ye an bara yan k’o jɔyɔrɔ fa. N’an ye misali ta hali cikɛlaw dɛmɛni kan, an bɛ t’a sɔrɔ ko banki wɛrɛw bɛ yen minnu bɛ juru don cikɛlaw la. Awa, olu ko juruw ni BNDA ka juru donnenw bɛɛ bɛ sara kadara kelen de kɔnɔ cikɛlaw fɛ. O kanma, n’a ni banki tɔw ka tɔnɔw sɔrɔcogo ye kelen ye, k’u baarakɛɲɔgɔnw fana kɛ kelen ye, a ka kan u ka lɛnpow n’u ka saalenw sarata fana ka kɛ kelen ye.

An ye nin hakilina bɔ « L’Essor » ka utikalo tile 5, san 2005 bɔko de kɔnɔ.
Labɛnbaga : Tuya Sidi

Sirabakan-kasaaraw cayara

An bɛ don min na i ko bi, sirabakan-kasaaraw cayalen bɛ Mali kɔnɔ, kɛrɛnkɛrɛnnenya la, Bamakɔ. Awa, o kasaaraw sɔrɔ don bɛrɛbɛrɛw ye alamisadon ani karidon de ye, ka d’a kan, o donw de ye furusirijamaw ka bɔkɔnfɛyaalaw donbaw ye. Mali jamana sariyɔsunba dun b’a pereperelatigɛ ko « nbɛndiya jamalajɛw » dagalen don fasodenw bɛɛ ye, nk’a k’a sɔrɔ dankari tɛ kɛ maa wɛrɛ taabolo la ». O de kanma, fu tɛ se ka siri yɛrɛ diya kɔɲɔkɛlaw ka bɔlɔnfɛyaala la, n’an k’o ma ko « kɔritɛzi », barisa a lakodɔnnen don sariya fɛ. Nka, taratadon, san 2005 utikalotile 9, lakanatigilamaaw ye ko bɛrɛntuda ta. Tiɲɛ don, kɔritɛzi tɛ se ka lakɔn barisa a lakodɔnnen don sariya fɛ. Nka a sirakan-bolidɛnw bolili fana ka kɛ sirakanboli sariya kɔnɔ dɛ. Taabolo jugu minnu mana ye a kɛbaw taabolo la kɔnɔ, i n’a fɔ bolifɛnw boliko jugu, ka siraba lajɔfɛnw sɔsɔ ; ka dankari maaw ka hakilisigi la minnu tɛ kɔritɛzi maaw ye, olu ni u ɲɔgɔnnaw bɛɛ bɛ ɲangi sa dɛrɛ. O bɛ min fɔ o de ye nin ye : « Maa ka furusiri yɛrɛdiyabɔ ko kɛtaw tɛ bali. Nka yamaruya tɛ yɛrɛdiyabɔlaw fana bolo u ka dankari kɛ ka ɲɛsin sirabakanboli saruyaw ma ani adamadenw ka hakilisigi la.

An ye nin hakilinan in bɔ « Les Echos » ka arabadon bɔkɔ kɔnɔ,
San 2005 utikalo tile 10.