Ne ye lakɔliden kɔrɔ ye min sigilen don Farakɔ dugu kɔnɔ bi. I n’a fɔ n faw ni n baw ani n kɔrɔw, n fana ka diɲɛnatigɛ bɛnnen bɛ dugukolo cikɛ de ma. N bɛ ɲɔ sɛnɛ, ani kaba ni tiga. Fɛn min ye malosɛnɛ ye, n b’o dafɛ fɔlɔ, nka n ma n sendonyɔrɔ sɔrɔ a la, ka da ko caman kan, i n’a fɔ dugukolo labaarali sariyaw. N’an ye jateminɛ kɛ, an b’a ye ko Mali cikɛla kun bɛ doni girin caman jukɔrɔ.
Hali bi, dabaninkurun tigilamaaw de ka ca. O bɔlen kɔ yen, n’a bɔra kɔɔri ni malo la, hakilatigɛ jɔnjɔn tɛ cikɛla si bolo a ka cikɛfɛnw feereli la mɔnɛbɔda la. Awa, cikɛla ka ko bɛɛ bɛ samiɲɛ sanji nacogoya de bolo anw bara yan. Ni san min ji nama ka labɔli kɛ, o san bɛ diya cikɛlaw bolo barisa an ye sɛnɛfɛn minnu don dugu rɔ, olu bɛ wuli ko ɲuman. Ni ji dun kɛra dɛsɛfɛn ye, o ye balawu ye an bɛɛ bolo. O b’a jira ko Mali cikɛlaw ka sɔrɔ fanba dulonnen don san diya n’a goya de la sanjiko siratɛgɛ la. Mali dun ye sɛnɛkɛ jamana lakodɔnnen de ye.

O kanma an ka sɛnɛko ɲɛmaaw ka kan ka fɛɛrɛ ɲini min bɛ a to cikɛla fanba bɛ kɛ minɛn girintigiw ye Mali fan bɛɛ fɛ. U ka wale kɛ min b’a to Mali cikɛla fanba ka baarakɛmɛnɛn ka kɛ tarakitɛriw ni cikɛminɛn motɛrimafɛn wɛrɛw ye : motopɔnpuw, ɛrɛsi ɲɛ ɲumanw, dugukolo jateminɛfɛn barikamaw. Tiɲɛdon, sanji ye koba ye sɛnɛko taabolo bɛɛ la. Nka dugukolo ɲuman labaara cogo min na ka kɔrɔ.

Nkan bɛ OACV ni Odiki waatiw ma. Nɔntɛ, an bɛ waati min na i ko sisan, cikɛyɔrɔ caman faantanyalen bɛ dɛrɛ ni malosɛnɛ lakodɔnnen tɛ minnu kɔnɔ a ɲɛma ni tiga ye an ka balo kolo girin dɔ ye, ale ka sɔrɔko tɛ ten i n’a fɔ a tun bɛ cogo min na Operasɔn arasidi tile la. N’i ye jateminɛ kɛ, i bɛ t’a sɔrɔ ko hali denmisɛnw ka tungafɛtaa a ye fɛn ye min barikalen don haali tigasɛnɛdaga kɔrɔbaw de kɔnɔ. Ni sɛnɛfɛn sɔrɔ tɛ labɔli kɛ, fiɲɛbɔnsenkɔrɔ bɛ kɛ sutara birifini ye nafoloko gɛlɛyaw ɲɛkɔrɔ dɛrɛ. O kan m, ne fɛ, ni Mali ɲɛmaaw bɛ ko o ko kɛ faantanya gɛlɛyaw kunbɛnni na, u ka kɔn ka fɛɛrɛ ɲini sɔrɔdaw siyali la sigidaw kɔnɔ. N bɛ Jɛkabaara sɛbɛnɲɛkulu maaw bɛɛ fo. N ka foli bɛ se Jamana baarada maaw bɛɛ ma, a ɲɛmaaba Hamidu Konate an’a baarakɛla tɔw bɛɛ. N bɛ Segu Ofisi-iri baarakɛlaw bɛɛ fo. N bɛ Jɛkabaara kalanbagaw bɛɛ fo.

Burulayi Kulibali
Cikɛla ka bɔ Farakɔ, Segu mara la