Nin ye bataki ye ka bɔ Seyidujan Kulibali yɔrɔ, Galakan Nɔtibugu, Cɛmɛna komini kɔnɔ.
Ne nisɔndiyalen bɛ bataki in sɛbɛn, k’a ci Jɛkabaara sɛbɛnɲɛkulu ma, ani Jɛkabaara kalanbagaw bɛɛ : cɛ ni muso ; Mali kɔnɔ ani Mali kɔ kan. Anw bara Galakan Nɔtibugu la yan, denmisɛnw farala ɲɔgɔn kan ka koperatifu dɔ sigi sen kan.

O koperatifu sigira sen kan an fɛ yiriwali baaraw waleyali kanma, ka ɲɛsin sigida ni denmisɛnw ka ɲɛtaa ma ; u siraw ɲinini. An ka koperatifu tɔgɔ ye “ denmisɛnw ka ɲɛtaa ye ”.
An ka koperatifu sigira se kan san 2005 awirikalo tile 4. An ye an ka koperatifu “ denmisɛnw ka ɲɛtaa ” in lakodɔnsɛbɛn (eresepise) sɔrɔ san 2005 mɛkalo tile 12.

An b’a ɲini Jɛkabaara ɲɛmaayaso fɛ, a k’an kunnafoni Jɛkabaara san kelen sɔrɔli musakaw la : sɔngɔ ni saracogo. Ka d’a kan, anw b’a ɲini an ni Jɛkabaara kunnafonisɛbɛn ka kɛ ɲɔgɔn baarakɛɲɔgɔn ye, kunnafoniko siratɛgɛ la, ka d’a kan Jɛkabaara kunnafonisɛbɛn nafa ka bon kosɛbɛ, anw togodalamaaw ka ɲɛtaa sabatili la.

An ka foli ni taanuni bɛ ɲɛsin Jɛkabara baarakɛlaw bɛɛ ma. An bɛ foli ni waleɲumandɔn lase Bkari Sangare ma, ka d’a ka ¬aniya ɲumanw laseli kan ɲɛtaabaaraw bolodacogo la, ka ɲɛsin togodalamaaw ma.
An bɛ Jɛkabaara kunnafonisɛbɛn ladɔnniya an ka adɛrɛsi la. O filɛ nin ye : Galakan Nɔtibugu “ Denmisɛnw ka ɲɛtaa ” koperatifu.

Sedujan Kulibali
Ka bɔ Galakan-Nɔtiguhu
Cɛmana komini (Bila kafo)

Jaabi

An balimakɛ Sedujan Kulibali, i ni ce i ka bataki sɛbɛnko ɲuman in na. A ye Jɛkabaara sɛbɛɲɛkulu nisɔndiya kosɛbɛ ka d’a kɔnɔko kan. Fɛn min ye Jɛkabaara san kelen sɔrɔli bakuranbansan ye, o bɛ bɛn maa kelen dɔrɔmɛ 300 de ma, n’a y’a sɔrɔ aw ka maa bɛ Bamaɔ yan a bɛ bila min ka bolo kan o k’a lase aw ma. Nɔntɛ, a laseli aw ma fo Galakan-Nɔtibugu, o fana musakanin bɛ da wari kan. Fɛn min ye aw ka koperatifu “ Denmisɛnw ka ɲɛtaa ” ni Jɛkabaara kunnafonisɛbɛn ka baarakɛɲɔgɔnya ye, o tɛ ko gɛlɛn ye. Aw bɛ se ka maa hakɛ dɔ (10…) don bakurunbasan na san kelen kanma, walima aw bɛ Jɛkabaara kunnafonisɛbɛn feereyɔrɔ dɔ dayɛlɛn aw bara jamana baarada ka yamaruya sɔrɔlen kɔ aw fɛ. O bɛɛ b’a to an bɛ dɛngɛnɛya sɔrɔ a kan ko Jɛkabaara bɛ kalan kosɛbɛ Galakan-Nɔtibugu.
Bɔkɔ nataw kɔnɔ ani ka da aw ka bataki citaw lahala kan an ma, an bɛ taa ɲɛ ni aw ni Jɛkabaara ka jɛɲɔgɔnya kɛli sababu tɔw ye. O bɛ aw nafa, o bɛ maa tɔw nafa, minnu ka laɲini ye nin ɲɔgɔnnaw ye.

Tumani Yalam Sidibe