N bɛ Jɛkabaara barakɛlaw n’a kalanbagaw bɛɛ fo. Ne ye kalanden ye an ka kalansoba la min bɛ wele ko « FLASH » (Filasi). N b’a kalanbon sabanan na, sɛkisɔn (kulu) larabukan kelennabila.

Ka bi lawale, fo bi, a dɔnnen don ko ni falenfɛn tɛ, adamaden tɛ balo. Ka masɔrɔ , sanni Ala ka adamaden da, a ye falenfɛnw fɔlɔ de da. O la, falenfɛnw fɔlɔ kɔnna adamaden ɲɛ dugukolo kan sigi la. N bɛ deli ka aw ka kunnafonisɛbɛn kalan minnu kumana cikɛla cɛma n’a musoma kibaruya kan.
Kibaruya olu bɛ kɛ sababu ye ka dusu don kunnafonisɛbɛn kalanbaa kɔnɔ.

I n’a fɔ aw ye Karamɔgɔ Danbele kibaruya min di, ka bɔ Leleni Fata, kunnafonisɛbɛn bɔko 235 nan kɔnɔ, 2005 san mɛkalo la, furaɲɛ 3 nan, ka t’a bila ɲɛ 4 nan na. Ani, aw ye kunnafoni dɔ di banankusɛnɛko kan, Jɛkabaara bɔ ko 229 nan, san 9 nan kan. O kanma, ne b ‘a ɲini kunnafonisɛbɛn ɲɛmaayaso fɛ, n’a tɛ kɛ baasi ye, a ka gɛrɛ sɛnɛkɛka ¬anaw la k’u ɲininka sɛnɛ taabolow la, u kunkun n’a ɲɛɲɛn, ka bi mɔgɔ bɛ sɛnɛ kɛli miirina ta, fɛn fɔlɔ min b’a ko la, ni sɛnɛkɛla ka kan k’o kɛ : k’a ta dugukolo ɲuman ɲinini na (a suguya ; a jimaya n’a jintanya), sɛnɛfɛn suguya min bɛ sɔn waati min na, a sɛnɛcogo ; a labaaracogo ; nɔgɔ suguya min ka kan ka k’a la ani a hakɛ min ka kan ka kɛ tari kelen na, a danni n’a kanni cɛwaati hakɛ (kalo hakɛ ; tile hakɛ). Furancɛ min ka kan ka don sɛnɛfɛnw ni ɲɔgɔn cɛ danni na ; sumansi suguyaw n’a cogoyaw ani a hakɛ min ka kan ka kɛ tari la. Aw bɛ nakɔko fana kunnafoniw ɲini k’o kibaruya di. Ni gafe dɔw sɛbɛnnen don nin kunnafoniw kan, aw bɛ se k’olu dɔw tɔgɔ fɔ an ye wa ? N bɛ Jɛkabaara ɲɛmaayaso fo. N bɛ barikabila kɛ ka t’a baarakɛlaw n’a kalanbagaw bɛɛ ma.

Burama Keyita
Bamakɔ-Kura-bolibana
Sunjata Keyita tɔgɔla
Bɔlɔn-Donda nimɔrɔ 257
Bamakɔ (Mali)