Danbelekɛ, i ni ce, i ni baraji. i ka foli n’i ka dugawu diyara ne ye kosɛbɛ. U bɛnna n ma fana. Ala ka duguwuw jaabi.
E tɛ balikukalanden gansan ye. I ye balikukaramɔgɔ jolen yɛrɛ de ye. i ni hakilimaya, ka d’a kan i ye ɲininkali minnu kɛ CMDT ɲɛmaaba la, olu b’a jira k’i bɛ caman kalama kɔɔriko la. Ɲininkali ɲɛnamaw don. U nafa ka bon haali.
I y’a fɔ i ka bataki kɔnɔ ko : “n bɛ Jɛkabaara san kalo o kalo ; n b’a kalan, barisa a bɛ mɔgɔ bɔ kunpan na”. I y’o hakilina ɲuman min sɔrɔ, an b’a ɲini i fɛ , i ka an dɛmɛ k’o hakilina don cikɛla tɔw bɛɛ kunma, kɔɔrisɛnɛ maraw kɔnɔ. Bawo, hali bi, dɔw hakili b’a la ko Jɛkabaara ye CMDT de ta ye. Ka sɔrɔ sɛnɛkɛlaw yɛrɛ de ta don. Walasa k’a sɛmɛntiya ko Jɛkabaara tɛ CMDT ta ye, kabini san 2004 la, an tun y’a boloda ko CMDT bɛna i senbɔ Jɛkabaara lajɛnsɛnni na an ka maraw kɔnɔ. Jɛkabaara ɲɛmaayaso yɛrɛ k’i labɛn o baara kanma. Sabu, mɔgɔ caman ɲɛna, CMDT bɛ “zurunaliw” laseli min kɛ cikɛduguw kɔnɔ, k’o de b’a jira ko Jɛkabaara ye CMDT ta ye. CMDT ta dun ye dɛmɛ de ye. Awa, gɛlɛya caman yera o dɛmɛ kɔnɔna na, i n’a fɔ zurunali sɔrɔbaliya joona a kalanbagaw fɛ ; zurunali wari saraliko CMDT ye a sɔrɔbagaw fɛ, a F.w…
O kanma, Jɛkabaara ɲɛmaayaso ye lasigiden dɔw sugandi CMDT maraw kɔnɔ, olu ye sɛnɛkɛlaw ye, minnu bɛ Jɛkabaara feere, ani k’a bakurunba-sanbagaw tɔgɔ sɛbɛn, k’o bataki lase Jɛkabaara ɲɛmaayaso ma.
Danbelekɛ, n b’a jira i la ko kunnafoniko tɛ tulonko ye. Mɔgɔ min mana i dan kunnafoni na, o b’i dan faamuya la.
Bɛɛ b’a dɔn ko kunnafoni bɛɛ tɛ se ka lajɛnsɛn arajo la. Wa, a bɛɛ fana tɛ se ka fɔ “tele” la. Kunnafoni dɔw fana bɛ yen, mɔgɔ ka kan ka minnu mara i bolokɔrɔ. O kunnafoni nafama caman de bɛ sɔrɔ Jɛkabaara kɔnɔ, kɛrɛnkɛrɛnnenya la sɔrɔ yiriwali taabolo cikɛda kɔnɔ, ani dugu kɔnɔ.
Danbelekɛ, n b’a fɔ i ye nin yɔrɔ in na ko : n’i ye dɔɔni sɔrɔ, n’i ma kɔrɔsɛn, a bɛ nagasi, i n’a fɔ n’i ye ɲɔ dan, n’i m’a kɔrɔsɛn, a bɛ nagasi bin fɛ cogo min na.
Munfɛn dun bɛ dɔɔni kɔrɔsɛn ? O ye kalan ye : yɛrɛkalan ani zurunalikalan…
Danbelekɛ ne siranna dɛ ! N sirankun ye mun ye bi ? Kalanbaliya sinsinna an ka AW ; APC ani CPC kɔnɔ. Bɛɛ b’a fɛ k’i yɛrɛ ta. Nka, si t’a fɛ ka kalan matarafa.
N’a fɔra k’an ka CPC dɔw kɔnɔ bi, sɛbɛnɲɛnabɔla tɛ se ka sɛbɛnko si ɲɛnabɔ, bawo, a tɛ se ka bataki sɛbɛn, kuma tɛ k’a kalan, a tɛ se ka jatebɔ kɛ, fo Ala ni jatebɔmasinw barika. Sɛbɛnɲɛnabɔla min ma jo, o bɛ se ka Jɛkabaara kalan wa ? “AW” b’a san, a bɛ ton yen, a si tɛ kalan !
Hali ni CMDT senbɔra balikukalan na, o man kan k’an bali ka kalansow sinsin an ka duguw kɔnɔ. An ka kalan, walasa an ka cikɛdaw bɛɛ ka kalanden jolenw sɔrɔ ; faamuya ka na dugu kɔnɔ, bɛn ka sinsin tɔnw kɔnɔ.
Danbelekɛ, i ni ce !
Dirisa Faseke Jalo
CMDT bolofara min ɲɛsinnen
bɛ duguyiriwatɔnw sinsinni ma, o ɲɛmaa
CMDT ɲɛmaayaso - Bamako