Ne Abudulayi Kulubali bɛ nin kunnafoni ci Jɛkabaara ɲɛmɔgɔw ma ka ɲɛsin sɛnɛ sabatilifɛnw sɔngɔ yɛlɛnni ma. San 2003/2004 baraasan kuntaala kɔnɔ, sɛnɛ sabatilifɛnw sɔngɔ yɛlɛnna kosɛbɛ, n’olu ye : kɔɔri nɔgɔfin ni nɔgɔjɛ ani ɲɔ nɔgɔfin ni furaji ani sijolanw ye. Ninnu tun ye fɛn ye minnu sɔngɔ tun man ca kosɛbɛ. N ka, an bɛ don min na i n’a fɔ bi, u sɔngɔ yɛlɛnni dogolen tɛ maa si la bi sɛnɛkɛyɔrɔw la. N’i y’a lajɛ, kɔɔri nɔgɔfin tun bɛ feere sefawari dɔrɔmɛ ba fila. Nka, bi, a bɛ feere sefawari dɔrɔmɛ ba fila ani kɛmɛ seegin ni bi wolonwula ni saba (2 873).
Nɔgɔjɛ tun bɛ feere sefawari dɔrɔmɛ ba kelen ani kɛmɛ duuru (1500). N ka bi, a bɛ feere dɔrɔmɛ 2 310.

Ɲɔ nɔgɔfin tun bɛ feere dɔrɔmɛ 2 100, nka bi, a bɛ feere dɔrɔmɛ 2 632.
Furaji tun tɛmɛ kɛmɛ fila kan litiri kelen na, nka bi, o bɛ feere dɔrɔmɛ 954 litiri kelen na.
Sijolan forogo kelen tun tɛ tɛmɛ dɔrɔmɛ 60 kan, n ka bi, o kelen feere dɔrɔmɛ 130.
N’i ye nin fɛn ninnu sɔngɔ yɛlɛn cogo lajɛ, ka kɔɔri koloma kilo kelen sɔngɔ lajɛ, ka musaka wɛrɛw lajɛ ka fara ninnu kan, kɔɔrisɛnɛ nafa bɛ dɔgɔya i ɲɛna kosɛbɛ, sabu, k’a daminɛ kɔɔri danni na fo ka taa s’a feereli ma, i bɛ nafolo min don a dafɛ ; k’olu bɛɛ jate minɛ ka kɔɔri kilo kelen dɔrɔmɛ 42 jate k’u bɔ ɲɔgɔn na kɔɔrikoloma kilo kelen tɛ tɛmɛ dɔrɔmɛ 15 kan. O tum, an bɛ min ɲini sɛnɛko minisiri fɛ, n’a ma ɲɛ ko dɔ bɔra kɔɔrikoloma sansɔngɔ la sɛnɛkɛlaw bolo, ni dɔ tun sera ka bɔ fɛn ninnu fana sɔngɔ la, o tun bɛ diya an ye kosɛbɛ. Nɔntɛ, n’a tara nin cogo la, forogonin bɛ to a dogisara la tuma dɔ la.
Abudulayi Kulubali, Nankɔrɔla
« AV » I Sekeretɛri