Dɛmɛnbaga jɛkulu minnu bɛ bɔ farajɛjamana ni farafinjamananw kɔnɔ ka na an dɛmɛ an ka diɲɛnatigɛ taabolo nɔgɔyali la, n’o ye faantanya kɛlɛli ye, u b’a fɔ ko an ka nakɔsinsanjiriw turu, k’a jiri turu bagandumuniko kanma, ka jiri turu tobili ni mago wɛrɛw kɛli kama, i n’a fɔ sobiliw n’a ɲɔgɔnnaw.
Fnɛn min ye an ka sɛnɛkɛforoko ye, u ko an ka foro bintaw kɛ hakɛ ye ka bɛn an bɛrɛ ma, i bɛ se ka foro min baara a tuma na, i k’o bin, o de nafa ko bon ni foroba binni ye.

Misali : mɔgɔ min ka forow bɛ baara ni wari ye, n’a tigi ka foro ka bon ka tɛmɛ a hakɛ kan, a tigi ka wari bɔta ka ca kosɛbɛ. O n’a ta bɛɛ, foro tɛ baara a tuma na, wa a nafa ka dɔgɔn. Ni mɔgɔ min ka foro ka dɔgɔn, a ka foro bɛ baara a tuma na, a ka wari bɔta ka dɔgɔn, a ka sɔrɔ ka bon.
Ala kana a kɛ, ni jintanya k’a bɛ kɛ, forobatigi ka nimisa fanga bɛ bonya kosɛbɛ a ka wari bɔlen nɔfɛ.
Fɛn min ye nɔgɔdingɛnko ye, sɛnɛkɛla mana se nɔgɔ dilan cogo la, o de nafa ka bon a kan. Nɔntɛ, angɛrɛ sɔngɔ ka ca cogo min, n’i ko i bɛ foro bɛɛ lakɛ nɔgɔ san, i ka sɔrɔ tilancɛ bɛ taa a la.
Bagandumui fana tɛ sɔrɔ sannina. O tuma, an k’an dɛmɛbagaw lamɛn, o de nafa ka bon an kan. Nɔntɛ, a mɛɛn o mɛɛn, dɔgɔmɛnɛta, sojiri, bagandumuni, sɛnɛkɛforo, ninnu bɛɛ laban bɛ dɔgɔya an na fɔ k’an kamanagan. O siratɛgɛ la, bamananw b’a f’u ka kuma dɔ la ko : « jɔn kunnandi ni jɔn kunango bɛɛ laadilikan ye kelen ye. Ni min ye laadilikan mɛn, o tigi ye jɔn kunnandi ye, ni min ma laadilikan mɛn, ni ko min y’o tigi sɔrɔ, o bɛ kɛ jɔn kunnango ye.
Ala ka laadilibaga ɲuman d’an ma.
Siyaka L. Tarawele ani
Solomani Kulubali
Animatɛriw don ka bɔ ¬ara Segu Ofisi-iri