(O ye Siyaka L. Trawele ka Jɛkabaara bɔko tɛmɛnen kɔnɔ ɲininkalisɛbɛn ye, an bɛna min jaabi nin yɔrɔ in na, i n’a fɔ an y’a lahidu ta cogo na)
Siyaka L. Trawele ka bataki jaabi :
An balimakɛ Siyaka L. Trawele ka ɲininkali tun bɛ Jɛkabaara kalanniko de kan an ka jamana ɲɛmaaw, ani Ofisi-iri ɲɛmaaw fɛ. A bɛ a fɛ k’a dɔn n’olu b’a kalan.
An bɛ karamɔgɔ Siyaka L. Trawele jaabi ko : haatɛ, u bɛ a kalan ! Hali n’a ye a sɔrɔ u tun tɛ a kalan baara taabolo yɛrɛ wajibiyasiraw kanma, u ka kan k’a kalan, barisa a kɔnɔko dɔnni de da ka di u la n’a dɔnbaliya ye. Mun kanma n b’o fɔ ? O kɔrɔ bɛ kɛnɛ kan. An ka misaliyata jamana ɲɛmaaw kan. Kunnafoni fɛn o fɛn bɛ jɛnsɛn u ka maramɔgɔw ni ɲɔgɔn cɛ, u ka kan k’o dɔn. O b’a to u b’a dɔn ko kunnafoni ditaw tɛna ni lagosisira si ye, walima fitinɛsira si ye jamanadenw ni ɲɔngɔn cɛ, walima jamanadenw ni jamana marabagaw ni ɲɔgɔn cɛ. O yɛrɛ kanma, kunnafonisɛbɛn si tɛ lajɛnsɛn jamana kɔnɔ, ka sɔrɔ a bɔɲɔngo kelen ma bila fɔlɔ jamana gafemarayɔrɔba la (bibiliyotɛki nasɔnali), n’an k’o ma ko : “depo-legali”.
O bɛ cogo min na cikɛ sɛriwusidaw fana b’o cogo la. Kunnafonisɛbɛn min bɛ lase cikɛlaw ma, seereya ka kan ka k’a kan k’o kɔnɔ kunnafoni bɛna ni cikɛlaw hakili dayɛlɛnni de ye ka ɲɛsin sigida kɔnɔ ɲɛtaabaaraw kɛcogo ɲuman ma.
A ka kan ka sɛmɛntiya ko kunnafonisɛbɛn don min bɛ hakilina fallen-falenni, ani bɔɲɔgɔn kalama ; ani ɲɔgɔndɔn sabati cikɛlaw ni ɲɔgɔn cɛ. A ka kan ka dɔn tiɲɛ lakika la ko kunnafonisɛbɛn in ye yɛrɛkalangafe de ye cikɛlaw bolo, monitɛriw ni cikɛɲɛmaa tɔw ka bilasiralikanw bɛ dafa u bolo min kɔnɔ. Nin bɛɛ de kanma, an bɛ karamɔgɔ Siyaka L. Trawele jaabi ko : Jɛkabaara bɛ kalan Ofisi ɲɛmaaw ni jamana ɲɛmaaw fɛ, i n’a fɔ a bɛ kalan ale yɛrɛ fɛ cogo min na.
Tumani Yalam Sidibe