Bɛɛ bɛ a kalama ko Mali ye jamana ye min ka diɲɛmatigɛ juba bɛ dugukolo ni a bɔnnafɛnw la : sɛnɛ ; kungo jiriw n’u kɔnɔfɛnw… Ka fara baganmara kan, nin fɛnw de ye Mali danbe ye.
Awa, sɛnɛ siratɛgɛ la, ni sumanw sɛnɛni b’an ka dunkafa sabati ani ka an ka dumusakaw di an ma, kɔɔri ni tiga ani malo ye nafolomugumafɛnw ye an bolo. Ni an ye nin bɛɛ sigi an ɲɛkɔrɔ minɛn basigilen kɔnɔ, an bɛ taa bɔ ko min kan o de ye nin ye : ni maliko marafanga ye dugubaw kɔnɔko ye, a ka diɲɛnatigɛ daamudaw ye cikɛduguw kɔnɔna ye.
An dun bɛ min kɔlɔsi, n’o bɛ an kamanagan, o ye cikɛduguw kɔnɔ kamalenw n’a sungurunw ka bɔko caya ye, ka u bɔyɔrɔw lankolonya, ka taa dugubaw kɔnɔmaw lafa gansan. O man kan, barisa, an bɛ don min na i ko bi, a ka kan ka sɛmɛntiya bɛɛ ma ko Mali ka ɲɛtaa tɛ bɔ dugubaw kɔnɔ, ka taa dugu misɛnw kɔnɔ, nka a bɛ bɔ dugumisɛn de kɔnɔ ka ɲɛsin dugubaw kɔnɔna ma.
Tumani Yalam Sidibe

Poyi : fulaw ni jataraw
Fula si naani
Jalo, Jakite, Sidibe, Sangare
Jatara si naani
Farankan-fula ; dɛmɛ-fula
Yɛrɛɲini-fula ; bɛnsenma-fula.
Ninnu bɛɛ bɛ jate fulaw ye
N k’u bɛrɛman tɛ fula danbe kɔnɔ.
Namori Sidibe ye jalon fulaw dɔ ye
Ka bɔ wasolon dugu dɔ kɔnɔ
Ale ye fula ye dɛrɛ
Fula don barisa a tɛ fulakan mɛn
Nk’a bɛ malo, a bɛ taasi.
N’i ye gaasi kɛ surafana ye
Ale bɛ si kɔngɔ la
Ka tomisɛn wolonwula to a tafanifɛ
A ko n ye ko :
Fulaya tɛ kanko ye
Nka diɲɛnatigɛ tɛmɛsira don
E m’a ye :
Fula de bɛ mɔnɛ bɔ a yɛrɛ la
Ka sɔrɔ a ma don
Maa wɛrɛ danbe dancɛw kɔnɔ
Fulaya ka di dɛrɛ
Jataraw de y’a lagosibagaw ye !
Tumani Yalam Sidibe

Hakilisɛnɛkɛnɛ
Dusu ɲuman de bɛ maa ɲɛ. Dusu jugu de bɛ maa tiɲɛ. Aw m’a ye : maa jugu dusu jugu de kɔngɔtɔ bɛ to goni to a dunbagaw bolo, k’a yɛrɛ da siri bin na !
Tumani Yalam Sidibe